कृष्ण कोपिलाको कृति ‘उसको अतीत’ सार्वजनिक

२०८३ असोज १९ गते काठमाडौं / 

वाम अभियन्ता कृष्ण कोपीलाको 'उसको अतीत' नामक कृति सार्वजनिक भएको छ ।

वाङ्मय उन्नयनको साझा चौपारी भन्ने मूल मन्त्रका साथ नेपाली साहित्य र वाङ्मयको क्षेत्रमा क्रियाशील लोमश वाङ्मय प्रतिष्ठानको दोस्रो वार्षिकोत्सव समारोहको अवसरमा सो कृति सार्वजनिक भएको हो । सो अवसरमा सस्थाको साहित्यिक प्रकाशन बइँसेरी २ को पनि लोकार्पण गरिएको छ ।

गण्डकी प्रज्ञा प्रतिष्ठानका कुलपति प्रा.डा. कुसुमाकर न्यौपानेको प्रमुख आतिथ्य तथा लोमश वाङ्मय प्रतिष्ठानका अध्यक्ष माधव घिमिरे ‘अटल’ को सभापतित्वमा संपन्न सो समारोहका विशेष अतिथि रहेका नेकपाका नेता जगन्नाथ खतिवडा, राष्ट्रिय दलित आयोगका अध्यक्ष देवराज विश्वकर्मा, प्रगतिशील लेखक सङ्घका पूर्व अध्यक्ष मातृका पोखरेल कृति परिचर्चाकार डीपी ढकाल, नरेन्द्र वज्राचार्य, केशव नेपाल, नीलकण्ठ तिवारी, होटल व्यवसायी महासङ्घका अध्यक्ष टीआर भण्डारी, लोकप्रसाद ढकाल, चक्र दवाडी, समीर राई, डा सावित्री श्रेष्ठ नेपाल प्रज्ञा प्रतिष्ठानका निवर्तमान सदस्य सचिव डा धनप्रसाद सुवेदीले कृतिको लोकार्पण गरेका थिए ।

आफ्नो नयाँ कृति ‘उसको अतीत’ सार्वजनिक बारे बोल्दै लेखक कृष्ण कोपिलाले आफ्नो जीवन यात्राका उकाली ओराली र कृति सिर्जना गर्दाका वास्तविक भोगाइहरू प्रस्तुत गरेका थिए । यस वर्ष प्रतिष्ठानबाट सम्मानित व्यक्तित्व युवराज इटनीको व्यक्तित्व र कृतित्वमाथि साहित्यकार जयराम बिडारीले प्रकाश पारेका थिए । सम्मान ग्रहण गरेपछि भावुक हुँदै इटनीले लोमश वाङ्मय प्रतिष्ठानबाट सम्मानित हुन पाउँदा आफूले सगरमाथाको शिखर चढेको जस्तो गौरव महसुस गरेको बताएका थिए ।

सार्वजनिक भएको ‘उसको अतित’ ४५० पृष्ठको रहेको छ । लोमश वाङ्मय प्रतिष्ठान प्रकाशक रहेको सो कृतिमा पछिल्लो पाच पुस्ता (हजुरबा देखी नाती ) का सन्दर्भ उल्लेख छन । ब्यक्तिगत, सामाजिक र राजनैतिक यात्राका बिभिन्न अनुभुति उतारीएको उनको यो कृतिमा लेखक संबद्ध नेपाल बुद्धिजीवी संगठन भित्रको प्रवृतिगत संघर्षका केहि घटनाहरु समेत उल्लेख भएका छन ।

०००